Қаллиқ визаси нима?
К-1 визаси нима?
Қаллиқ визаси (ёки К-1 визаси) АҚШ фуқаролари билан АҚШда қонуний никоҳдан ўтиб, АҚШни тарк этмасдан, доимий қонуний резидент мақомини олиш истагида бўлган чет эл фуқаролари учун мўлжалланган. К-2 визалари К-1 визаларини олган шахсларнинг фарзандлари учун мўлжалланган бўлиб, бу фарзандлар ҳам виза суҳбатига келишлари шарт.
К-1 визасига ҳужжатларни топшириш жараёни нимадан иборат?
АҚШ фуқароси бўлган қаллиғингиз ўз яшаш жойи бўйича ваколатга эга бўлган АҚШ Фуқаролик ва Иммиграция Хизматининг Хизмат Марказига почта орқали I-129 (Чет эл фуқароси бўлган қаллиқ учун петиция) Формасини топшириши керак.
Қаллиғингиз АҚШдан ташқарида яшаётган бўлса, у петицияни ўзининг АҚШда энг сўнгги яшаган жойида ваколатга эга АҚШ Фуқаролик ва Иммиграция Хизматининг АҚШда жойлашган Хизмат Марказига (Service Center) почта орқали топшириши керак. Қаллиғингиз Сизнинг номингизга петицияни топширганидан кейин, сиз петициянинг мақомини АҚШ Фуқаролик ва Иммиграция Хизматининг Иш Мақомини Текшириш Саҳифасида текширишингиз мумкин.
АҚШ Фуқаролик ва Иммиграция Хизмати маъқулланган петицияни АҚШ Давлат Департаментининг Миллий Виза Марказига юборади. Миллий Виза Маркази эса, ўз навбатида, петицияни Тошкентдаги АҚШ элчихонасининг Иммиграцион Визалар бўлимига жўнатади. Иммиграцион Визалар бўлими сизга электрон почта орқали К-1/К-2 визаларига мурожаат этувчилар учун йўриқнома юборади.
I-129 Формасини тўлдиришда нималарга эътибор бериш керак?
К визаси учун петиция топширганлар ўзларининг Ўзбекистондаги қаллиқлари билан боғланиш учун тўғри маълумот (Contact information) киритишлари керак (масалан, манзил, телефон рақами, элеkтрон почта манзили ва ҳкз.). Агар боғланиш учун маълумотлар киритилмаган бўлса ёки улар нотўғри бўлса, бу ишни кўриб чиқишни ва суҳбат вақтини белгилашни кечиктиради.
Қаллиқ қандай форма(лар)ни тўлдириши керак?
Қаллиқ DS-160 электрон анкетани тўлдириши керак. Бу анкетани электрон равишда Консуллик Масалалари Бюросининг Консуллик Электрон Анкеталар Маркази саҳифасида тўлдириш лозим. Сиз суҳбатингизга шу DS-160 анкетасининг тўлдирилганини тасдиқловчи саҳифани принтерда чоп этиб, олиб келишингиз шарт! Илтимос, анкетанинг штрих-коди аниқ чоп этилганига ишонч ҳосил қилинг (НАМУНАга қаранг).
Ҳам I-129, ҳам DS-160 Формаларини тўлдиришда йўриқномаларга (Instructions) аниқ амал қилиш даркор. Йўриқномаларга аниқ амал қилмаслик ишингизнинг кўриб чиқилиши кечикишига олиб келиши мумкин.
К-1 визаси билан АҚШга келганимдан кейин нима қилишим керак?
К-1 визаси билан АҚШга кирганингиздан сўнг АҚШ фуқароси бўлган қаллиғингиз билан қонуний никоҳдан ўтишингиз керак. Никоҳдан АҚШга кирганингиздан кейин 90 кун ичида ўтишингиз шарт. АҚШда қонуний никоҳдан ўтганингиздан сўнг, сиз ва АҚШ фуқароси бўлган қаллиғингиз АҚШ Фуқаролик ва Иммиграция Хизмати билан боғланиб, мақомингизни Доимий Қонуний Резидентга ўзгартиришингиз керак. Сизнинг мақомингиз ўз-ўзидан, автоматик равишда ўзгармайди.
АҚШнинг Ўзбекистондаги элчихонаси вебсаҳифасига жойлаштирилган маълумотлар асосида тайёрланди.